ယခင်က ရန်ကုန်နှင့် မန္တလေးတိုင်းဒေသကြီးများတွင်သာ သုံးစွဲခွင့်ပြုထားသော အဆိုပါ ငါးသိန်းတန် တယ်လီဖုန်းများကို ဒေသခံပြည်သူများအနေဖြင့် ပိုမိုစိတ်ဝင်တစား သုံးစွဲ ခဲ့ကြပြီး ယခုအခါ သုံးစွဲသူ ပြည်သူများ ပိုမိုအဆင်ပြေစွာ သုံးစွဲနိုင်ရန်အတွက် အင်တာနက် များကိုပါ ချိတ်ဆက် အသုံးပြုနိုင်ရန် စီစဉ်ဆောင်ရွက်ထားပြီး ဖြစ်ကြောင်း သိရသည်။
“အစတုန်းကတော့ ဒီဖုန်းတွေကို ရန်ကုန်နှင့် မန္တလေးမှာသာ သုံးစွဲခွင့်ပြုခဲ့ပါတယ်။ ဒီလိုသုံးစွဲခွင့်ပြုခဲ့ရာမှာလဲ ပိုမိုအဆင်ပြေစွာ သုံးစွဲနိုင်ဖို့အတွက် (01) ဆိုတဲ့ ကုတ်နံပါတ် တွေကို (09)သို့ ပြောင်းလဲပေးခဲ့သလို ယခုဆိုရင် အင်တာနက်တွေပါ ချိတ်ဆက်အသုံးပြု နိုင်တဲ့အထိ ဝန်ဆောင်မှုတွေ ပေးထားတော့ ပြည်သူတွေအနေနဲ့ ပိုပြီး တိုးလျှောက်လာ ကြတာ တွေ့ရပါတယ်။
ရန်ကုန်နဲ့ မန္တလေးမှာ လက်ရှိချပေးနေတဲ့ ဒီဖုန်းတွေ သတ်မှတ်လုံးရေ ပြည့်တော့မှာ ဖြစ်ပါတယ်။ ရန်ကုန်မှာ ဆိုရင် အလုံးရေ ၃၀,၀၀၀ ခန့် သာ ကျန်ပြီး မန္တလေးမှာ အလုံးရေ ၁၀,၀၀၀ လောက်သာ ချပေးဖို့ ကျန်ပါတော့တယ်။ ယခု ထပ်မံချပေးဖို့ ဆောင်ရွက်နေတာ ကတော့ မြန်မာနိုင်ငံအနှံ့မှာရှိတဲ့ တိုင်းနဲ့ ပြည်နယ်က မြို့နယ်တွေမှာလဲ ငါးသိန်းတန်ဖုန်း ကို အသုံးပြုခွင့်ရဖို့အတွက် အလုံးရေ ၈၀,၀၀၀ ချပေးဖို့ ဆောင်ရွက်နေပါပြီ” ဟု ဆက်သွယ်ရေး၊ စာတိုက်နှင့် ကြေးနန်းဝန်ကြီးဌာနမှ တာဝန်ရှိသူ တစ်ဦးက ပြောသည်။
မြန်မာနိုင်ငံအနှံတွင် မကြာခင် စတင်ချပေးတော့မည့် အဆိုပါ ငါးသိန်းတန်ဖုန်းများကို ဧရာဝတီတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ တနင်္သာရီတိုင်း ဒေသကြီး၊ ကချင်ပြည်နယ်၊ ရှမ်းပြည်နယ်နှင့် ရခိုင်ပြည်နယ်တို့တွင် ရှိသော မြို့ကြီးများကို ဦးစားပေးချပေးမည် ဖြစ်ပြီး ကျန်တိုင်းနှင့် ပြည်နယ်များမှ မြို့ကြီးများတွင်လည်း လျင်မြန်စွာ သုံးစွဲခွင့် ရရှိနိုင်ရန် စီစဉ်ဆောင်ရွက်ပေးမည် ဖြစ်ကြောင်းသိရသည်။
“လက်ရှိကျွန်တော်တို့ဆီမှာ သုံးနေတဲ့ ဖုန်းကတော့ ငါးသိန်းပဲ။ ဒါပေမဲ့ 09- 49 နဲ့စတဲ့ 450MHz ဖုန်းတွေပါ။ ယခင်က ရန်ကုန်ဖုန်းလို့ ပြောနေကြတဲ့ ဒီငါးသိန်းတန်က 09 မဟုတ် တဲ့အတွက် ကျွန်တော်တို့နယ်တွေဘက်မှာ သုံးလို့မရခဲ့ပါဘူး။ ယခုဆိုရင် ရန်ကုန်ဖုန်းကိုလဲ 09 ကုတ်ပြောင်းလိုက်ပြီဖြစ်တဲ့အတွက် တစ်နိုင်ငံလုံးမှာသုံးစွဲလို့ ရနေပြီဆိုတော့နောက် ဆိုရင် ဒီဖုန်းတွေကိုပိုပြီး အသုံးပြုလာကြမှာ သေချာပါတယ်။
ဘာဖြစ်လို့လဲဆိုတော့ ဒီ 800MHz ဖုန်းရဲ့ အားသာချက်က အင်တာနက်ပါ အသုံးပြုလို့ ရပြီဖြစ်သလို ဝန်ဆောင်ခလဲ သက်သာတဲ့အတွက် ကျွန်တော်တို့လို နယ်ဒေသခံတွေ အနေနဲ့ ပိုပြီး အကျိုးရှိလာမှာ ဖြစ်ပါတယ်” ဟု စစ်တွေမြို့နယ်တွင် 09-49641xxx သုံးစွဲနေသည့် ဒေသခံ တစ်ဦးက ပြောသည်။
ရန်ကုန်နှင့် မန္တလေးတွင် သုံးစွဲခွင့်ပြုထားသော အဆိုပါ CDMA 800MHz WLL ဝိုင်ယာလက် အော်တိုတယ်လီဖုန်း၏ ကုတ်နံပါတ်မှာ ယခုအခါ 01 မှ 09 အဖြစ်သို့ ပြောင်းလဲလိုက်ပြီ ဖြစ်သော်လည်း ယင်းဖုန်းများကို မြန်မာနိုင်ငံအနှံတွင် အသုံးပြုခွင့် ရရှိရန်အတွက် ဟန်းဆက်များကို ပြောင်းလဲကိုင်ဆောင်ရမည် ဖြစ်ပြီး ဖုန်းခေါ်ဆိုခ နှုန်းထားများကို ယခင်ခေါ်ဆိုခ နှုန်းထားအတိုင်းသာ ဆက်လက် ကောက်ခံသွားမည် ဖြစ်ကြောင်း သိရသည်။
ယခုအခါ ငါးသိန်းတန် CDMA 800MHz မိုဘိုင်းဖုန်း အလုံးရေ ၁၆၀,၀၀၀ ကျော်ကို ရန်ကုန်မြို့တွင် သုံးစွဲခွင့်ပြုထားပြီး မန္တလေးတိုင်း ဒေသကြီးတွင် အလုံးရေ ၄၅,၀၀၀ ကျော် ချပေးထားပြီး ဖြစ်ကြောင်း သိရသည်။
ရန်ကုန်တိုင်းဒေသကြီးအတွက် ထပ်မံချပေးရန် ဖုန်းမှာ အလုံးရေ ၃၀,၀၀၀ သာ ကျန်ရှိ နေပြီး မန္တလေးတိုင်းဒေသတွင် အလုံးရေ ၁၀,၀၀၀ သာ ကျန်ရှိနေသည် ဟု သိရသည်။ မြန်မာနိုင်ငံအနှံ့တွင် မကြာခင်ချပေးတော့မည် အဆိုပါ ဖုန်းများကို သက်ဆိုင်ရာ တိုင်းနှင့် ပြည်နယ် အသီးသီးရှိ မြို့ကြီးများတွင် တိုက်ရိုက် လျှောက်ထားခွင့် ပြုထားမည်ဟု သိရသည်။
0 comments:
Post a Comment
(အတ္တာဟိ အတ္တနော နာထော) မိမိသည်သာလျှင် မိမိ၏ အားထားရာဖြစ်သည်။